الرئيسية / المقالات / انت يا ورقة من غيرك ما أسوى شي

انت يا ورقة من غيرك ما أسوى شي

مؤسسة التدريب المهني تعتمد الحقيبة التدريبية المدرب وعلى أساسها يصير مدرب معتمد لدي الحزمة من الورق فقط أي كلمة برا دي الحزمة يعتبر غير مرخص , يعني اتعب وادفع فاوس من جيبي عشان اكون مدرب معتمد واخرتها بس ورق الي يخليك معتمد وتلقط رزقك من مركز تدريب بللتاني على حقيبة تدريبية وحدة .

المبتعثين برا مساكين يدرسو ويسهرو ويدفعو قروش من جيوبهم والله يعلم كيف امورهم ماشية واخرتها لو شهادتهم مو معتمدة عندنا في وزارة التعليم االعالي روح بلها واشرب مويتها لانك بالعربي ما كانك سويت شي الورقة الي جبتها مالها قيمة وانت بالاخير لسا مؤهلك ثانوي

الي بيقدم على وظيفة لو ملفه ما فيه اوراق تثبت صحة كلامه الي بالسيرة الذاتية ماله لزمة يقدم لازم يجمع اوراق كتير عشان ممكن ينقبل او ياخد مرتبة احسن , الشغلة تنقاس بكمية الورق الي موجود في ملفك وخلي خبراتك العملية و كرفك وشغلك وتعبك على جنب

في دوائر حكومية لو ورقة ناقصة وتكون مالها داعي هي بس اجراء روتيني راحت معاملتك في الدرج و لا كل شوي بتسمع تعال بكرة راجعنا .

محاكمنا صارت ماتعترف الا بالورق الي قدامها والحلف بالله و الانسان الي قدامك مو معترف فيه لازم تعطينا ورق الله يجزاك خير
وزارة التجارة انت كلك بموظفينك بفلوسك بممتلكاتك بكل ارباحك وخسايرك وانجازاتك تساوي ورقة اسمها السجل التجاري او ترخيص البلدية او تصريح مع انه سارت الدول الاخرى بالانترنت تخلص امورك برقم سجلهم مو ضروري يحضرو الورقة.

الورقة سارت ممكن تخلص شؤونك وممكن تعطلها ممكن ترعف ناس وممكن تنزلهم , مافي أي اعتبار للانسان الي تعب وسهر ودفع من وقته و فلوسه وجهده عشان يحصل على الورقة الي تخلي الجهات الرسمية تقدر الانسان و يعتبر انسان ذو هوية متعلم عاقل راشد .
صرنا في عهد التكنولوجيا و التطور والانترنت و احنا لازم نسمع ملفك كاملة اوراقه اهلا وسهلا مو كاملة ناقصها ورقة تافهة كلك مالك لزمة …. يعني الارقام الموجودة بدي الاوراق ماتكفي نوفر وقت وتكاليف وورق تعب روح وجية بس نحط الرقم في نظام خاص لكل دائرة او مؤسسة او أي مكان ويطلع لك كل المعلومات … اشمعنا دا النظام نجح نجاح باهر بسرعة في تجميعه كل المعلومات الي عن الشخص بس يحط رقم بطاقته الوطنية عند البنوك او شركات الاتصالات و لا الجوازات الحق اكفش عليه فلوس للبنك الفلاني و لا الهرجة فيها تجميع فلوس و سلخ المواطن الغلبان وفي نفس الوقت لو جا يبغا دا المواطن يحسن من وضعه المادي و الاجتماعي او الوظيفي لازم يدوخ السبع دزخات يجمع في اوراق الحظ

ادا انت يا ورقة من غيرك ما اسوى شي … لمتى واحنا نقدر الانسان عندنا بكمية الورق الي مجمعها في ملف سيرته الذاتية مو تقدير انسان روح وفكر وعلم و اخلاق وكدا نضيع على وطننا عطاء ناس ممكن تفيد وتنتج وتساهم في عجلة التطوير

شارك الخبر |

شاهد أيضاً

سمير ودلال

بقلم : الدكتور خليفة الملحم سمير غانم اسم ارتبط بالفن و الضحك و الفكاهة فقد …